મુંબઈ હીટ એન્ડ રન કેસમાં પોલીસે મોટી કાર્યવાહી કરી, શિવસેનાના નેતા સહિત બે લોકોની ધરપકડ

મુંબઈની વરલી પોલીસે હિટ એન્ડ રન કેસમાં બે લોકોની ધરપકડ કરી છે. વરલી પોલીસે રવિવારે રાજેશ શાહ અને અકસ્માત સમયે કારની અંદર રહેલા વ્યક્તિ રાજર્ષિ બિદાવરની લાંબી પૂછપરછ બાદ ધરપકડ કરી હતી. ઉલ્લેખનીય છે કે આરોપી મિહિર શાહ ઘટના બાદથી ફરાર છે. પોલીસે તેને પકડવા માટે કુલ 6 ટીમો બનાવી છે. અગાઉ પોલીસે મુંબઈના વરલી વિસ્તારમાં હિટ એન્ડ રન કેસના મુખ્ય આરોપી મિહિર શાહના પિતા રાજેશ શાહ અને ડ્રાઈવર રાજર્ષિ બિદાવરની અટકાયત કરી હતી. પોલીસ મિહિરની ગર્લફ્રેન્ડની પણ પૂછપરછ કરી રહી છે. હિટ એન્ડ રન કેસમાં મિહિરને મુખ્ય અને એકમાત્ર આરોપી જાહેર કરવામાં આવ્યો છે. પોલીસ તપાસમાં સામે આવ્યું કે કારનો વીમો ઉતરાવ્યો ન હતો. વીમાની મુદત પૂરી થઈ ગઈ હતી.

માછલી લઈને ઘેર આવતાં બીએમડબલ્યુ કારે ઉડાવ્યાં

રવિવારે સવારે લગભગ 5 વાગ્યે મુંબઈના વર્લીમાં હિટ એન્ડ રનનો મામલો સામે આવ્યો હતો. વરલીના કોલીવાડામાં રહેતા માછીમાર દંપતી પ્રદીપ નાખ્વા અને કાવેરી નાખ્વા માછલી લેવા માટે સસૂન ડોક ગયા હતા. ત્યાંથી પરત ફરતી વખતે એક BMW કારે તેને પાછળથી ટક્કર મારી હતી. અકસ્માતમાં પતિ-પત્ની ગંભીર રીતે ઘાયલ થયા હતા. પરંતુ કાવેરીનું સારવાર દરમિયાન મોત થયું હતું, જ્યારે પ્રદીપને ગંભીર ઈજાઓ થઈ હતી.

આખી રાત પાર્ટી કરી સવારમાં એક્સિડન્ટ કર્યો

આરોપી મિહિર શાહ કાર ચલાવી રહ્યો હતો. મિહિરની બાજુની સીટ પર અન્ય એક વ્યક્તિ બેઠો હતો, જે તેનો ડ્રાઈવર હોવાનું કહેવાય છે. અકસ્માત બાદ મિહિર ઘટનાસ્થળેથી ફરાર છે. આરોપી મિહિરના પિતા રાજેશ શાહ પાલઘર જિલ્લામાં એકનાથ શિંદેની આગેવાની હેઠળની શિવસેનાના નેતા છે. મિહિર શાહે ગઈ કાલે એટલે કે શનિવારે રાત્રે 11 વાગ્યે જુહુમાં વોઈસ ગ્લોબલ તાપસ બારમાં તેના મિત્રો સાથે પાર્ટી કરી હતી અને પાર્ટી પછી તે વરલી તરફ ગયો હતો, જ્યાં હિટ એન્ડ રનની ઘટના બની હતી. જુહુ પોલીસની ટીમ વાઇસ ગ્લોબલ બાર પહોંચી અને સમગ્ર મામલાની તપાસ કરી. પોલીસ એ જાણવાનો પ્રયાસ કરી રહી છે કે પાર્ટીમાં કેટલા લોકો સામેલ હતા અને પાર્ટી દરમિયાન તેઓએ કયું પીણું પીધું હતું.